Wie?

Pols die swerwersbloed deur jou are? Jeuk jou voete?

Maak klein dorpies, stofstrate, die natuur, vreemde disse en selfs hoë wolkekrabbers jou opgewonde?

Is moerkoffie jou eerste taal?

Dan móét jy ‘n bietjie vertoef by VroetelVoete!

Meer oor VroetelVoete

VroetelVoete is die Afrikaanse digitale droomkind van Anje, die een agter die pen van die Engelse reisblog, Going Somewhere Slowly.

Hierdie reisblog bring die pad, die onbekende en ‘n paar wenke tot by jou rekenaarskerm.

So óf jy nou meer wil weet oor tannie Betsie se melktert óf lekker kampplekke en doendinge óf ‘n hip buurt in ‘n groot stad, dít sal jy alles hier kry in Afrikaans…

…want soms klink dit net beter in Afrikaans.cropped-cropped-web_banner2.jpg

Meer oor Anje

As die reisgogga eers gebyt het is daar geen oplossing vir die reisverslawing nie.

Hallo en welkom by VroetelVoete; welkom by my aanlyn-notaboek waar die rigting wat ek inslaan omgesit word in woorde en visuele stories.

Ek is ‘n reisiger, ‘n skrywer en ‘n koffieverslaafde wat al voetspore gelaat van hier tot doer, maar my tone is trots in Moeder Afrika se grond ingeboor. Ek kies graag koers na die onbekende plekke waar interessante ditjies en datjies skuil; ‘n mooi sonsondergang, ‘n groot beker koffie, die bos, straatkuns, my fiets en wolke sit ‘n glimlag op my gesig, ‘n foto op my kamera en woorde in my stories.

Kom reis saam; volg die blog, lees meer op Facebook, geniet die foto’s op Instagram en twiet saam op Twitter.

Ek het VroetelVoete en glo vas: as die voete jeuk, VAT DIE PAD!

Kom jy saam?

Neem Asseblief Kennis: Alle inhoud (artikels, foto’s en videos) word geskep deur VroetelVoete (Anje Rautenbach) tensy dit anders aangemeld word. Alle opinies op hierdie webwerf is my eie en indien reise, akkommodasie, produkresensies ens. geborg word sal dit genoem word. Moet asseblief geen inhoud gebruik sonder my toetstemming nie. Dankie.